Сэтинньи 16 күнүгэр нэһилиэкпит талааннаах оҕолоругар анаан “Ыллаа – туой оҕо саас” биирдиилээн толорооччулар ырыа күрэҕэ ыытылынна.

Бу бырайыак автордарынан буолаллар А.П. Лыткина аатынан “Ырыа” норуот айымньытын дьиэтин уус – уран салайааччыта, СР культуратын туйгуна Светлана Борисова уонна Ф.Гоголев аатынан Чыаппаратааҕы эр дьон народнай хорун салайааччыта Мичилия Гоголева.

Бырайыак сыала – соруга ырыа абылаҥар кэлэр кэнчээри ыччаты тардыы, саҥа талааннары арыйыы.

Кыттааччылар 4 категорияҕа арахсан кытыннылар:

• Оскуола иннинээҕи саатаах оҕолор
• Алын сүһүөх кылаас оҕолоро (1-4 кл)
• Орто сүһүөх кылаас оҕолоро (5-8 кл)
• Үөһээ кылаас оҕолоро (9-11 кл)

Дьүүллүү сүбэҕэ үлэлээтилэр:

Хон Иван Иванович -   Саха республикатын культуратын туйгуна, Чыаппаратааҕы   эр дьон народнай хорун   солиһа, сыана ветерана, Саха Республикатын тыатын хаһаайыстыбатын үтүөлээх үлэһитэ

Рожина Иванна Ивановна - Г. Д. Протодьяконов аатынан Алаҕар орто оскуолатын педагог организатора, Хотугулуу Илиҥҥи Федеральнай университет   саха салаатын выпускницата, оскуолаҕа үөрэнэр сылларыгар “Кэнчээри” оҕо образцовай ырыа   ансамбылыгар дьарыктаммыта.

Гоголева Ольга Ильинична - "Преданность детству" бэлиэ хаһаайына, СР үөрэҕириитин туйгуна, РФ педагогического үлэ бэтэрээнэ

Кыайыылаахтар:

Сэтинньи ый 3 күнүгэр Чурапчы оройуоннааҕы "Айылгы" норуот айымньытын дьиэтигэр биир дойдулаахпыт, культура туйгуна, мелодист - Константин Мохначевскай эмтэнэригэр күүс - көмө буолар аһымал кэнсиэр буолла.

Балаҕан ыйын 15 күнүгэр Чурапчы улууһун Алаҕар нэһилиэгэр историяҕа киирэр биир бэлиэ күн буолан ааста. Ол курдук, сахаттан биир бастакы идэтийбит тыл үөрэхтээҕэ, лингвист-учуонай, суруйааччы Гавриил Васильевич Баишев – Алтан Сарын төрөөбүтэ 125 сылыгар анаммыт тэрээһиҥҥэ ыраахтан-чугастан ыҥырыылаах ыалдьыттар, хаан-уруу аймахтара тоҕуоруһа муһуннулар.

Дьоро күн саамай долгутуулаах түгэнинэн нэһилиэк килбэйэр киинигэр, Алтан Сарыҥҥа аналлаах мэҥэ таас аһыллыыта, олохтоох түмэлгэ анал стендэ, култуура дьиэтигэр улуу киһибитигэр анаммыт кинигэлэр, суруйуулар быыстапкаларын сүрэхтэниилэрэ буолла. Бу үтүө тэрээһиҥҥэ Саха Республикатын Култуураҕа миниистирин бастакы солбуйааччы Афанасий Ноев, Ил Түмэн депутата Павел Ксенофонтов — Ойуур Байбал, ХИФУ Төрүт омуктар тылларын институтун директора Гаврил Торотоев, улуус салалтатыттан Афанасий Дьячковскай, Г.В.Баишев – Алтан Сарын аймахтара, олохтоох нэһилиэнньэ кыттыыны ыллылар.
Саха норуота төрөөбүт тылынан сайа саҥарарын туһугар олоҕун анаабыт улуу киһибит аатын үйэтитиигэ үлэлэһэр хаан-уруу аймаҕа Руслан Алексеевич Баишев үбүлүөйдээх сылга анаан сүүрэн-көтөн, аймахтарын көҕүлээн, бу күн Алтан Сарыҥҥа аналлаах мэҥэ бэлиэ (пааматынньык) үөрүүлээх быһыыга-майгыга арылынна. Пааматынньыгы биллэр скульптор Николай Огонеров чочуйан оҥорбут. Эдэркээн Алтан Сарын икки илиитин өрө көтөҕөн, кинигэтин туппутунан, будьурҕай баттаҕа, көстүүмүн тэллэҕэ, моонньугар эрийэ бырахпыт саарпыга сиккиэр тыалга тэлимнээн, киэҥ аартыгы арыйан, кэскиллээҕи түстүүр уобараһа бар дьон сүргэтин көтөхтө.
Руслан Алексеевич үбүлүөйдээх сылга өссө туох үлэ-хамнас былааннаммытын бар дьоҥҥо билиһиннэрдэ. Алтан Сарын “Тоҕус этиҥ тойуга” кинигэтэ саҥардыллан “Айар” кинигэ кыһатыгар тахсыахтааҕын, “Саха” көрдөрөр-иһитиннэрэр хампаанньа каналыгар анал документальнай киинэ оҥоһулла сылдьарын, инникитин Саха драматическай театра Алтан Сарын олоҕун көрдөрөр испиэктээҕи туруорар былааннааҕын бу күн тоҕуоруспут улуу киһи биир дойдулаахтара, аймахтара олус үөрэ, долгуйа иһиттилэр. Улуу киһилэригэр сүгүрүйэн тыыннаах сибэкки дьөрбөлөрүн мэҥэ бэлиэҕэ уурдулар.
Дьоро күн үөрүүтүн “Туймаада” вокальнай ансаамбыл ырыаһыттара ыллам ырыаларынан киэргэтэн, бар дьоҥҥо эҕэрдэ кэнсиэрдэрин бэлэхтээтилэр. Үрдүкү сыанаттан Алтан Сарын суруйан хаалларбыт айымньылара хоһоон буолан доргуччу ааҕыллан, ырыа буолан дьиэрэччи ылланан, номоҕон бэйэлээх ыраас мөссүөнэ бар дьонун диэки унаарыччы көрөн олороро үгүс дьону долгутта, кини сахатын норуота кэлэр кэскиллээх буоларын туһугар турууласпыт үлэтэ-хамнаһа биир дойдулаахтарыгар киэн туттууну үөскэттэ.

Галина ПОЛУСКИНА - ыстатыйатаЧурапчы, Чыаппара.

Бүгүн балаҕан ыйын 19 күнүгэр, Хоту көһөрүллүү 81 сылыгар, көһөрүллүү кыттыылаахтарын сырдык ааттарыгар, Кыайыы болуоссатыгар Алаҕар орто оскуолатын, ЖКХ, "Алгыс" уһуйаан, олохтоох дьаһалта, "Ырыа" НАДь эр дьоно хатыҥ мас олоттулар.
Ону таһынан нэһилиэкпит киин сиригэр, А. П. Лыткина аатынан норуот айымньытын дьиэтигэр уопсайа 100 хатыҥ мас олордулунна.
Субуотунньук кыттыылаахтарын олохтоох дьаһалта, "Ырыа" НАДь кыргыттара сылаас аһынан, чэйинэн аһаттылар.
Бары тэрилтэ салайааччыларыгар, эр дьоммутугар, техниканан көмөлөспүт, кыттыспыт дьоммутугар, куруук сүбэ - ама, күүс - көмө буолар убайдарбытыгар Лыткин Василий Васильевичка, Протодьяконов Филипп Васильевичка МАХТАНАБЫТ!

Ыам ыйын 8 күнүгэр Алаҕар нэһилиэгэ Улуу Кыайыы 78 сылын көрүстэ. Нэһилиэкпит ветераннара, тэрилтэлэрэ, оскуолабыт үөрэнээччилэрэ Кыайыы парадыгар кытыннылар.
Киирии уонна эҕэрдэ тылы нэһилиэк баһылыга И. И. Оконешников эттэ, салҕыы  Аҕа саастаах дьоммутугар тэрилтэлэр  26 ветераҥҥа өйдөбүнньүк бэлэхтэри туттардылар.
Нэһилиэкпит үтүө үгэстэриттэн кэпсээтэхпитинэ:
- Сылын ахсын  Илья Федорович, Валентина Эмильевна Гоголевтар дьиэ кэргэттэрэ үлэ тыыл ветераннарыгар, сэрии оҕолоругар, уонна СВОҕа барбыт уолаттар ийэлэригэр, дьонноругар бэйэ бородукциятын, капченай кууруссаны бэлэх набор оҥорон, акцияларын ыыттылар.
- Куруук буоларын курдук хонуу куукунатыгар гречка хааһыны, итии саахардаах чэйи  Г. Д. Протодьяконов аатынан Алаҕар орто оскуолатын повардара бэлэмнээннэр бырааһынньыкка ураты тыыны киллэрэллэр.
- Нэһилиэкпит ветераннара "Кыайыы алаадьыта" акция оҥорон кыттыстылар.
Тэрилтэлэр байыаннай ырыаларынан, Кыайыы оһуокайынан түмүктээтибит.
Ол кэннэ ветераннарбытыгар кулууппут дьиэтигэр "Ааспыты ахтан..." истиҥ кэпсэтии, чаепитие буолла.

Киэһэ Кыайыы скверыгар "Өйдөбүнньүк чүмэчи", "тэрилтэлэр икки ардыларыгар "Майский вальс" күрэҕэ ыытылынна.

Маны таһынан Г.Д. Протодьяконов аатынан "Алаҕар кэскилэ" парламент оҕолоро "Георгиевская лента", "Окно Победы", Бессмертный полк онлайн акцияларга кытынныбыт.