Алаҕар нэһилиэгэр 2022 сыл түмүгүнэн бастыҥнары чиэстээтилэр. Үөрүүлээх тэрээһиҥҥэ нэһилиэк баһылыга Иван Иванович Околнешников 2023 сылы нэһилиэккэ Сир сылынан биллэрдэ.
Алаҕарга төһө иэннээх ходуһа, мэччирэҥ, дулҕанан-талаҕынан үүммүт сирдэр баалларын, маны сэргэ хас бааһына сирэ хаалан турарын эттэ, билиһиннэрдэ.
Быйылгы Сир сыла улуустааҕы "Сир Ийэ" пилотнай бырагыраамаҕа итиэннэ Өрөспүүбүлүкэҕэ Үлэ сылыгар олоҕуран ылыллыбытын бэлиэтээтэ. Манна туһаайан нэһилиэккэ туох былааннар, соруктар туралларын билиһиннэрдэ. Сири кытта үлэҕэ туһааннаах исписэлиистэри, анал тэрилтэлэри кытта сүбэлэһэн, бырайыак оҥорон улуус дьаһалтатыгар бигэргэтиигэ киллэрбиттэрэ.
Эбэн эттэххэ, нүөлсүтүү, дулҕаны ыраастааһын, бааһыналары кэҥэтии үлэлэригэр, күөх ыһыыга, сиилэскэ араас тиэхиньикэлэр наадалар. Онуоха анал бырагыраамалаах нэһилиэктэргэ биирдии үрдүк кыамталаах тыраахтардары утары үбүлээһининэн ылан, бары түмсэн СПОК тэрийэн, үлэ ыытыллара тоҕоостоох.
Тэрээһин бэлиэ түгэнинэн меценат, "Прогресс" ХЭТ салайааччыта Алексей Пинигин тус этиитигэр аныгы ирдэбилгэ толору эппиэттиир уһуйаан тутуутугар ылсарын эттэ.
Салгыы 2022 сылга үрдүк көрдөрүүлэли ситиспит бастыҥнары ааттыыр үөрүүлээх чаас үүннэ. Ол курдук:
Бастыҥ үөрэҕирии эйгэтин үлэһитэ - Мария Слепцов;
Бастыҥ култуура үлэһитэ – Калерия Борисова;
Бастыҥ Чыаппаратааҕы 6 нүөмэрдээх баһаарнай чаас үлэһитэ – Виталий Тотонов;
Бастыҥ үйэтитиигэ үлэлэспит түмсүү - «Тумэл» музей коллектива, сал. Егор Сорокоумов;
Бастыҥ дьиэ кэргэн - Валентина уонна Илья Гоголевтар;
Бастыҥ ыччат – Жанна Шеломова;
Бастыҥ көхтөөх кыттааччы – Илья Баишев;
Бастыҥ ыспарсымыан – Иван Гуляев;
Бастыҥ кэтэх хаһаайыстыбалаах
дьиэ кэргэн – Анастасия уонна Егор Сивцевтар;
Бастыҥ түмсүү - «Эйгэ» иистэнньэҥнэр түмсүүлэрэ, сал. Евдокия Сорокоумова;
Бастыҥ ОДьКХ үлэһитэ – Андрей Мохначевский;
Бастыҥ тыа хаһаайыстыба үлэһитэ – Николай Копырин;
Бастыҥ уопсастыбанньык – Тамара Лыткина;
Бастыҥ доруобуйа харыстабылын үлэһитэ улэһитэ – Сахая Кузьмина;
Бастыҥ уһуйаан иитээччитэ – Анна Баишева.
Бу күн мустубут дьону-сэргэни кэрэ куоластаах "Үрдэл - 2022" муусука бириэмийэтин финалиһа Вероника Степанова "Касабланка" ырыатынан эҕэрдэлээтэ. Маны тэҥэ олохтоохтор "Туой хайа-2021" кыайыылааҕа Инна Донская – Дайаана уонна ырыаһыт, ааптар Татьяна Андросова – Андреана ырыаларын истэн, дуоһуйа сынньанан тарҕастылар.
