Бүгүн кулун тутар 22 күнүгэр көмүс дорҕоонноох күөрэгэйбит Анастасия Петровна Лыткина төрөөбүт күнэ - 94 сааһа.

1927 сыллаахха кулун тутар 22 күнүгэр Чурапчы улууһугар Алаҕар нэһилиэгэр төрөөбүтэ. тоҕус сааһыттан төрөөбүт улууһугар оскуолатын уус - уран көрүүлэригэр кыттыбыт.

Дьиэ кэргэнэ Дьокуускайга көһөн, Пионердар дьиэлэрин иһинэн үлэлээбит ырыа уонна үҥкүү ансаамбылларыгар ыллаабыт (салайааччыта - С.К. Джангаваладзе). 

Оҕо эрдэҕиттэн Екатерина Захарова ырыаларын сэргээн истибит, киниттэн ыллыырга үөрэммит. Екатерина Захарова ырыаларыттан ордук "Ол түүн" (Эллэй тыллара) ырыаны сөбүлээн ыллаабыта. 

1940с. республикатааҕы бастакы оҕо уус - уран айымньытын көрүү олимпиадатыгар жюри биһирэбилин ылбыта. ол кэмҥэ Анастасия Лыткина музыкальнай драма театрын үлэһиттэрэ - концертмейстер П.К. Розинская, ырыа коллективын салайааччыта М.Н. Жирков, хормейстер В.П. Попов - бэлиэтии көрөн, 1943с. театрга хор артыыһын үлэтигэр ыҥырбыттара. 

1944с. алта эдэр ырыаһыт бөлөҕөр киирэн, Свердловскайга М. Мусоргскай аатынан Ураллааҕы государственнай консерваторияҕа үөрэххэ ыыппыттара.

Консерваторияны 1949с. үөрэнэн бүтэрбитэ.

1970 - с сыллар саҥаларыттан Дьокускайдааҕы музыкальнай училищеҕа үлэлээбитэ. 

Саха омук ктэн туттан, уос номоҕо оҥостон кэпсиир, тарбахха баттыыр аатырбыт ырыаһыттарыттан биирдэстэринэн бастакы анал консерваторскай үөрэхтээх идэтийбит ырыаһыт, төрөөбүт норуотун вокальнай искусствотын аан маҥнай кыраныысса таһыгар, аан дойду таһымыгар таһаарбыт САССР уонна РСФСР үтүөлээх артистката Анастасия Петровна Лыткина буолар. Кини үрдүк, үтүө аата Саха сирин музыкальнай культуратын историятыгар биир ойуччу боччумнаах миэстэҕэ үйлэргэ суураллыбат гына кыһыл көмүс буукубаларынан суруллан хаалла...

Билигин Ырыа куттаах Алаҕар нэһилиэгэ "Ырыа" норуот айымньытын дьиэтэ  - Анастасия Петровна Лыткина аатын сүгэр, таһаарыылаахтык, айымньылаахтык үлэлии олорор.

А.П. Лыткина аатынан "Ырыа" НАДь директора Тотонова Е.Н.